Түркмөнстандын президенти Гурбангулы Бердымухамедов «Түркмөнстандын дары өсүмдүктөрү» фундаменталдуу эмгегинин 12-томун жазды. Бул тууралуу Түркмөнстандын мамлекеттик маалымат агенттиги жазды.
Жаңы китеп Саламаттыкты сактоо кызматкерлеринин жана Медицина өнөр жай кызматкерлеринин күнүнө карата басылып чыккан.
«Дары өсүмдүктөрүнүн» мурунку 11-тому 2019-жылдын июль айында, 21-июлда белгиленүүчү Саламаттыкты сактоо кызматкерлеринин күнүнө карата басылып чыккан. Быйыл күзүндө медицина кызматкерлеринин майрамы эч кандай себепсиз 10-октябрга жылдырылган.
Эске салсак, Бердимухамедов буга чейинки «Түркмөндөрдүн руханий дүйнөсү» аттуу китебин эки ай мурун жазып бүтүргөн болчу. Бул президент жазган 54-китеп болуп эсептелинет.
Белгилей кетүүчү нерсе, китепте сүрөттөлгөн рецепттердин негизинде Түркмөнстанда чөптөн чай өндүрүү иши жолго коюлган. Аны түркмөн дарыгерлери сасык тумоодон дарыланууда колдонууну сунуш кылышат.