Пакистан Ислам Республикасынын мамлекеттик деп эсептелген Улуттук банкынын Бишкек шаарындагы филиалы жабылат. Бул тууралуу маалыматты банктын операциялык иштер боюнча менеджери Жылдыз Табалдиева тастыктаган.

Анын маалыматы боюнча, буга банктын бизнес-стратегиясы өзгөргөнү себеп болуп жатат. Мындай чечим директорлор кеңеши тарабынан кабыл алынды.

«Бул Кыргызстандагы коомдук-саясий кырдаал, экономикалык абал менен байланыштуу эмес. Финансылык абал туруктуу. Пакистандын Улуттук банкы Борбор Азия аймагынан кетүүнү чечти», - деди Ж.Табалдиева.

2020-жылдын 31-октябрына карата Кыргызстандын аймагында 23 коммерциялык банк ишмердүүлүгүн жүргүзүп жатат.