Facebook социалдык тармагы АКШдагы президенттик шайлоого бир апта калганда саясий жарнамаларды чыгарбоо чечимин кабыл алды. Компаниянын негиздөөчүсү Марк Цукерберг акыркы күндөрү америка коомунда пайда болгон карама-каршылыктардын күчөп кетишин ооздуктоо максатында мындай чечим алууга мажбур болгондугун билдирди. Цукерберг фэйсбук аркылуу саясий идеялар жарыяланып, мунун арты массалык башаламандыкка айланып кетүү коркунучу бар экендигин кошумчалады. АКШда президенттик шайлоо 3-ноябрда өтөт. Шайлоодо Дональд Трампка демократтардын атынан талапкер Жо Байден атаандаш болууда.