Коронавирус пандемиясынан улам дүйнөдө туризм тармагынын кирешеси 50 пайызга чейин кыскарды. Бул тууралуу Бириккен улуттар уюмунун дүйнөлүк туризм тармагы билдирди. Уюмдун маалыматы боюнча, пандемиядан улам, эл аралык туризм тармагы ушул жылдын январь айынан май айына чейинки аралыкта 320 миллиард долларга жакын каражат жоготкон. Бул көрсөткүч 2009-жылдагы дүйнөлүк экономикалык кризистен улам келтирилген зыяндан үч эсе көп. Чектөө чаралары жана авиа каттамдарга тыюу салуу 2020-жылдын алгачкы беш айында туристтердин санын 300 миллионго чейин азайтты. Бул өткөн жылдын ушул мезгилине салыштырмалуу 56 пайызга аз. Май айында сапарлардын саны 98 пайызга азайды деп айтылат уюмдун отчётунда. Бул туризм экономиканын негизги таянычы болгон мамлекеттерге катуу сокку урду. Алар: Мальдив аралдары, Сейшел жана Багамы аралдары. Таиланд менен Филиппин дагы олуттуу экономикалык жоготууга учураган. Европада Испаниянын ички дүң продукциясынын 14,9 пайызы жана Италиянын 13 пайызы туризмден көз каранды. Коронавирус инфекциясы дүйнөдө 17 миллиондон ашык адамдан аныкталды.